今仔日欲介紹ê是呂美親老師編ê《現代台語小說選》，這是台灣歷史內面ê第二本台語小說集。頭一本是1998年，宋澤萊編ê《台語小說精選卷》，kah這馬這本相仝是前衛出版社出版ê冊，二十外冬了，才koh有第二本台語小說選集。這本舊年出版ê《現代台語小說選》是呂美親老師去揀出來，去編輯ê。
伊真用心，為著欲予毋捌台語ê人了解，伊用華語寫萬外字ê導言來說明台語文ê發展 ，台語文學按怎受著殖民ê影響，台語用字是按怎leh變化。這馬ê人掠準講，咱本底就leh講ê台語beh變做文字，就是共喙講ê，寫出來就好。真濟人是leh討論tio̍h寫白話字，抑是寫漢字，抑是欲漢羅濫寫。美親老師講uì台語文學作品來看，台語文佇過去欲 uì書面語變做白話，共口語寫落來，是一个真無簡單ê過程，欲按怎ē當言文一致是經過真濟討論。
出這本冊，我想上費精神ê是文字改寫kap校對，這是上辛苦的工課。逐家lóng知影寫出來ê文字tio̍h-ài修改。一篇文章改幾若擺，攏猶看會著錯誤，這本內面收集ê是無仝作者佇無仝年代寫ê文章。有用白話字寫ê，有用漢字，有漢字羅馬字濫寫，羅馬字的比例koh無相仝，仝一个台語音，無仝人寫ê漢字mā無仝。 美親老師kah伊ê學生kah出版社ê編緝是一字一字改，予逐篇文章ē使統一用字，予這馬ê讀者看有遮ê文章。
這本內底揀日本時代ê5篇kah 1990年代以後ê9篇小說，這kah台語寫作ê發展有真大ê關係。在日本時代ê作家賴和，楊逵攏捌用台語寫小說。M̄-koh戰後ê語言政策予台語創作無法度推展，就等候到解嚴以後1990年代才閣變濟。
Uì文學作品ē使看著一个社會ê模樣kah變化。佇這本冊內底ê文章mā看ē著台灣百年來ê轉變。早期佇日本時代ê作品，展現出來ê是彼个年代有法度攑筆寫作ê人，in對殖民暴力ê反抗，對社會基層人民ê關心，uì遮ê小說看ē出in受著彼ê時代ê共產主義kah社會主義ê影響。1990年代開始，台語小說關心ê議題變多元：寫ê是族群ê關係，外來統治者蹛來ê打壓kap文化影響，海外烏名單內面ê人受著ê打壓，民主化以後地方政治kah選舉ê現實，這部份反映ê是台灣ê政治變化。另外1990年代ê作品有寫同性kah不倫ê戀愛，精神病人ê照顧，家庭關係ê轉變，uì遮14篇短短ê小說內面，咱看ē著台灣ê變化。若是欲讀以台灣為主體ê角度，寫出來ê作品，這本《現代台語小說選》絕對是真重要ê入門冊。
我佇遮欲特別介紹這本內底，王貞文ê作品《 自由時代》。這篇是第一屆海翁台語文學獎小說類ê正獎。Ē號做《自由時代》是欲紀念鄭南榕kah鄭南榕發行ê，仝名ê雜誌。小說ê起頭是leh寫鄭南榕出殯彼工ê遊行，詹益樺自焚ê代誌，這ê事件予主角，阿河，攏睏袂好。
小說寫ê是1990年代，是台灣改嚴了，社會有真濟變動， 有濟濟改革kah向望ê年代。阿河代表ê是社會底層ê人物。彼時陣kah阿河相仝ê人袂少，遮ê基層ê黨外人士，家己ê生活攏無好過，就像阿河，伊是靠in某，靜珠，佇夜市仔擺擔leh生活。M̄-koh阿河ê向望就是建立一个新ê國家。這部小說內底寫阿河按怎開始有政治覺醒？按怎開始去參加抗爭kap運動？伊ê心境按怎綴環境改變。
阿河是無背景，無啥物才調，mā變無啥輾轉。後來佮意著一个查某囡仔，開始接觸黨外運動，揣著民主建國ê理想。伊受著環境ê限制，參加黨外運動koh tio̍h覕警察。無論伊按怎變，遇著啥物代誌，伊身軀邊攏有一個提供他生活穩定，予伊溫暖kah倚靠ê靜珠。因為in某靜珠kah伊ê友志，阿河才對伊ê後代ē使出世佇自由ê時代，開始有向望。
內底寫ê是一个男性按怎因為無仝ê女性揣著理想kah向望，當然這是我用真白ê方式講出來。王貞文是台語文學內面，真早予人看著ê女性作家，猶bē用台語創作進前，就有出過華語冊。伊本人ê故事我佇這个節目ê第70集捌講過。我ē介紹這篇是因為這本《現代台語小說選》內底干焦有兩篇女性寫ê，另外一篇後禮拜就會講著。是按怎干焦收兩篇，紲落來，拜三呂美親老師就ē解說。伊ē共咱講，伊是按怎揀這14篇小說，伊ē介紹內底ê作品，當然伊ē先共聽友講，伊是按怎變做台語作家。
沒有留言:
張貼留言